Danska stjórnin: ES má halda altjóða viðtøkur í makrelmálinum

Sjúrður Skaale setti í farnu viku donsku stjórnini eina røð av spurningum um heimildarlógina, sum skal geva ES møguleika fyri at seta tiltøk í verk - millum annað ímóti Føroyum.

Høvuðsendamálið við spurningunum var at varpa ljós á, at partar av uppskotinum um heimildarlógina helst eru í stríð við viðtøkur, sum ES-londini sjálvi hava gjørt, til dømis í altjóða handilsfelagsskapinum WTO.

Orsøkin er, at heimildarlógin ikki bara tykist hava umhvørvispolitisk- men eisini handilspolitisk endamál: Ætlanin er ikki bara at verja makrelstovnin, men – fyrst og fremst – at verja ídnaðin í ES. Og tað er neyvan í samsvari við tað, sum ES-londini sjálv hava samtykt í WTO-høpi.

Hetta leggur eina serliga skyldu á Danmark, tí tað er Danmark, sum umsitur limaskap Føroya í WTO. Men hetta ger eisini støðuna trupla, tí vilja Føroyar senda WTO eina klagu um heimildarlógina, má tað helst vera Danmark, sum letur klaguna inn – samstundis sum tað m.a. er Danmark, sum partur av ES, ið klagað verður um.

Nú hevur Mette Gjerskov, matvøru- og fiskimálaráðharri, vegna stjórnina svarað spurningunum við hesum orðum:

”Regeringen lægger stor vægt på, at forslaget skal være i overensstemmelse med WTO-reglerne og FN’s Havretskonvention. Der pågår på nuværende tidspunkt en nærmere analyse af, hvorvidt sanktionsinstrumentet er foreneligt med EU’s internationale forpligtelser. Færøerne er omfattet af Danmarks medlemskab af WTO. Rigsfælles­skabets interesser i WTO varetages af Danmarks regering. Det er for tidligt at forholde sig til en evt. klage til WTO fra Danmark på vegne af Færøerne”.

Sjúrður Skaale sigur tað í fyrstu atløgu vera nøktandi, at stjórnin leggur dent á, at uppskotið skal samsvara við nevndu reglur.

Sjúrður Skaale fer komandi viku til Bruxelles fyri at greiða m.a. donskum socialdemokratiskum limum í Europaparlamentinum frá hvussu týdningarmikið tað er, at teir í viðgerðini av hesum máli taka atlit til allan ríkisfelagsskapin.